Хуурай сүү, үнээний шингэн сүү 2 юугаараа ялгаатай вэ?

2016-09-23     17297

Сүү гэж юу вэ гэвэл малын дэлэнгийн булчирхайн шүүрлийн үр дүнд бий болсон, найрлагадаа уураг, тос, нүүрс ус, эрдэс аминдэмийг тодорхой хэмжээ, харьцаагаар агуулсан, ямар нэгэн бодис, нэгдэл нэмээгүй, эсхүл сүүний бүрэлдэхүүн хэсгээс ялгаж аваагүй биологийн үнэт шингэн.

Сүүний бүтэц найрлагын 11-14 хувь нь хуурай бодис, 86-89 хувь нь ус байдаг.

Тэгэхээр хуурай сүү (хатаамал сүү) гэдэг шингэн сүүн дэх хуурай бодисын агууламж нь 95 хувиас багагүй байхаар сүүний усыг ууршуулсан бүтээгдэхүүнийг хэлж байгаа юм.

Хуурай сүү үйлдвэрлэх хоёр арга байдаг.
Нэг нь тоосруулан хатаах, нөгөө нь хальслан үелэж хатаах арга. Хальслан үелэж хатаах аргаар хуурай сүү бэлтгэхэд сүү хуучин байдалдаа хүртэл сэргээгдэхгүй, өнгө, үнэр, амт нь бага зэрэг өөрчлөгддөг талтай.

Иймд сүүлийн жилүүдэд сүүний, ялангуяа түүний уургийн бүтцэд өөрчлөлт оруулдаггүй тоосруулах аргаар хуурай сүү үйлдвэрлэж байна. Тоосруулан хатаах аргын мөн чанар нь өтгөрүүлсэн сүүг өндөр даралттай халуун агаарын урсгалтай орчинд тоосонцор байдлаар цацаж, чийгийг нь ууршуулан хатаахад оршино.

Ингээд хуурай сүүгээ дахин сэргээж, шингэн сүү болгодог. Сэргээсэн сүү гэдэг хуурай сүүг усанд уусган механик, дулааны аргаар боловсруулж, хэвийн (шингэн) сүүний төлөвт шилжүүлэн түүгээр сүү, сүүн бүтээгдэхүүн үйлдвэрлэж буйг хэлээд байгаа юм.

Тиймээс сэргээсэн хуурай, шингэн сүү гэдэг маань эцсийн эцэст адилхан л үнээний сүү.

Үнээний сүүний уураг нь инсулин төст өсөлтийн хүчин зүйл 1 (IGF 1) болон өсөлтийг түргэтгэдэг болох нь судалгаагаар нотлогдсон. Сүүний уураг нь их хэмжээтэй байвал (эхийн хөхний сүүнээс 3 дахин их) хүүхдэд ахлах насанд нь таргалалт үүсэх магадлал нэмэгддэг, түүнчлэн таргалалтаас үүсэх бодисын солилцооны эмгэгүүд болох даралт ихсэх, судас хатууралт, чихрийн шижин үүсэх магадлал өндөр болдог.

Үнээний сүүний дархлаа дэмжих чадвар, хүүхдийн өсөлт хөгжилд хэрэгцээтэй шим тэжээлийн бодисын агууламж, боловсролт нь хөхний сүүнийхээс хэд дахин дутуу байдаг. Өдөрт 500 мл үнээний сүү хэрэглэх нь 12 сартай хүүхдийн хоногийн илчлэгийн 38%ийг хангах боловч тухайн насны физиологийн нормоос 50%-иар их уургийг авдаг болох нь тогтоогджээ.

Түүнчлэн өдөрт 500 мл-ээс дээш үнээний сүү хэрэглэх нь хүүхдэд төмөр дутагдлын цус багадалт үүсэх магадлал бий болгодог.





» буцах
Шинэ
Их уншсан
© Зохиогчийн эрхийг хуулийн дагуу Ээж - Хайрын аппликейшн эзэмшинэ. 2015 он